Проширувањето на Европската Унија не е само економска и трговска неопходност, туку предуслов за политичка и безбедносна стабилност на целиот континент, порача министерот за надворешни работи и надворешна трговија, Тимчо Муцунски, во своето обраќање на Делфи економскиот форум што се одржува во Грција. Тој порача дека е неопходно да се обезбеди јасен и опиплив пат напред за регионот, кој ќе го врати кредибилитетот и ќе ги исполни очекувањата од процесот на европска интеграција.
Во своето обраќање на панел-дискусија на тема: „Дали ЕУ – САД алијансата е надвор од поправка“, Муцунски зборуваше за европската перспектива на земјите од Западен Балкан, важноста на регионалната соработка, стабилноста на регионот, стратешкото партнерство во рамките на НАТО, како и на соработката со САД и трансатлантската поврзаност.
Тој ја истакнал важноста на регионалната поддршка, која особено вели се манифестираше по трагедијата во Кочани. Шефот на македонската дипломатија пред присутните уште еднаш упатил искрена благодарност до Грција за покажаната солидарност и медицинска помош.
Во однос на улогата на САД, Муцунски ја подвлекол нивната клучна улога како инвеститор – не само во политичката и безбедносната, туку и во економската стабилност на регионот – истакнувајќи дека САД се меѓу највидливите и најсилните поддржувачи на процесот на проширување на Европската Унија.
