Тешка сообраќајна несреќа се случи денеска околу 16 часот на автопатот Тетово – Скопје, во која животот го загубија три лица. Според првичните информации, до несреќата дошло при судир меѓу патничко возило „опел“ со тетовски регистарски таблички и автобус.
Од ударот, маж и жена починале на самото место, додека уште една жена подлегнала на повредите во Клиничката болница во Тетово. Таму е пренесено и повредено дете, кое е во лекарска грижа.
На терен се јавен обвинител, екипи на полицијата и на противпожарната служба, кои вршат увид. Од СВР Тетово најавија дека дополнителни детали ќе бидат соопштени по целосното документирање на настанот.
