Инклузијата на ромската заедница во процесот на европска интеграција на Македонија и улогата на граѓанскиот сектор во тој процес ќе бидат во фокусот на денешниот настан „Ромската заедница и интеграцијата на Македонија во Европската Унија“, што ќе се одржи во Клубот на пратеници во Скопје.
Настанот ќе го одбележи и завршувањето на проектот „Ромскиот граѓански сектор за пристап до ЕУ“ (RomCSO4EU).
Организаторите најавуваат презентација на постигнатите резултати од проектот, како и дискусија за заложбите на институциите за унапредување на положбата на ромската заедница во контекст на евроинтеграциските процеси.
На собирот ќе учествуваат претставници на институции, меѓународни организации и граѓанскиот сектор, кои ќе разменат искуства, добри практики и ставови за предизвиците и можностите за поголема вклученост на Ромите во реформските процеси поврзани со членството во Европската Унија.
Проектот RomCSO4EU го имплементираат АДДР „Сонце“ од Тетово, Ромскиот ресурсен центар од Скопје, Ромската асоцијација за жени и млади „Лулуди“ од Скопје и грчката организација Symplexis, а е финансиран од Европската Унија.
