Ако САД навистина сакаат да ги решат проблемите преку дијалог и преговори, треба да заземат позиција на еднаквост, почитување и взаемна корист, е пораката од Кина. Кина ќе продолжи да презема решителни и ефективни мерки за да ги заштити своите права и интереси.
Трамп, пак, имитирајќи го однесувањето на земјите кои се обидуваат да преговараат за царините, пред новинарите изјави:
„Овие земји ме викаат, ми го бакнуваат задникот. Умираат од желба да се договориме. Ве молам, господине, договорете се. Сè ќе направам. По ѓаволите, знам што правам, јас сум единствениот кој би вовел царини бидејќи сите се плашеа. Се плашеа од критики.“
Вчера, светот се разбуди со реализација на заканата од американскиот претседател Доналд Трамп за зголемување на царините. САД воведе царина од 10% на увозот од скоро сите земји, а за некои, особено за оние со суфицит со САД, царините се зголемија од 11% до дури 50%. Новата американска тарифна политика најтешко ја погоди Кина, која доби дополнителни 50%, што резултираше со царина од 104% на стоката што влегува од таа земја во САД. Земјите на Европската Унија, исто така, беа многу погодени, со дополнителни царини од 20% на веќе постоечките 25%.
Кина, пак, најави воведување реципрочна царина од 50% на производите од Америка, што би резултирало со царина од 84%. Портпаролот на кинеското Министерство за надворешни работи, Лин Џијан, истакна дека САД продолжуваат да злоупотребуваат царини за вршење притисок врз Кина и дека ова не е прифатливо.
Во меѓувреме, Трамп се пофали дека од царините секој ден се инкасираат две милијарди долари, иако податоците на Министерството за финансии покажуваат дека во февруари се собрани 7,25 милијарди долари, што значи дека во просек дневно се собирале околу 200 милиони долари.
САД продолжува да ја засилува својата тарифна политика, додека земјите како Европската унија веќе подготвуваат противмерки за царините воведени од САД.
