Американскиот претседател – Доналд Трамп, го претстави дизајнот на американскиот футуристички противракетен систем „Златна купола“, за кој кажа дека ќе влезе во функција до крајот на неговиот мандат.
Трамп го најави овој проект неколку дена по враќањето во Белата куќа во јануари. Златната купола ќе ги штити САД од воздушните закани од следната генерација, вклучувајќи балистички и крстосувачки проектили.
Во новиот буџет веќе е вклучена почетна сума од 25 милијарди долари за изградба на штитот, но се проценува дека тој ќе чини најмалку 175 милијарди долари. Штитот е потребен, зашто постојните одбранбени системи заостануваат зад модерните оружја што ги поседуваат можните непријатели.
Трамп смета дека воздушните напади остануваат најголемата закана со која се соочуваат САД.
– „Сите ќе бидат елиминирани во воздух. Стапката на успешност ќе биде блиску до 100 проценти“, тврди Трамп.
Системот е делумно инспириран од израелската „Железна купола“ за пресретнување на проектили и ракети.
