Лажната лиценца за дискотеката „Пулс“ не е единствена, постои најмалку уште една, информира министерот за внатрешни работи Панче Тошковски.
Тој додаде дека досега во истрагата се опфатени 26 лица, но дека оваа бројка нема да биде конечна.
До сега, 18 лица имаат определено мерка притвор, а седум ќе бидат изведени пред судија на претходна постапка. Дополнително, едно лице, кое е едно од раководните во Министерството за економија, ќе биде дел од истрагата.
Тошковски нагласи дека седум полициски службеници му овозможиле на кабарето да работи во супстандардни услови.
„Тие констатирале дека кабарето ги исполнува условите за заштита на јавниот ред и мир, како и за сообраќај. Одобриле и потпишале известување до Министерството за економија, во кое навеле дека кабарето ги исполнува законските услови, иако не извршиле проверка. Изработиле телеграма, но не ги наведоа точните и целосни податоци дека во близина на кабарето имало пријави за нарушување на редот и мирот“, рече Тошковски.
