Повеќе од деценија откако беше донесен форматот пржинска односно техничка Влада, тој веќе е надмината работа и потребно е негово укинување. Во Македонија веќе долги години ја нема политичката криза, поради која беше постигнат тој пржински договор, кој предвидува технички премиер и министри на предлог на опозицијата да бидат да стапат на функција на 100 дена пред одржување на парламентарни избори. Според познавачите она што го иницира премиерот Христијан Мицкоски е повеќе од очекувано.
Политичкиот аналитичар Александар Ристевски смета дека е добро што власта иако може сама да донесе промена во овој дел, сепак покажува отвореност и повик сите политички чинители да се договорат заедно и оваа одлука да биде донесена со консензус.
-Поентата не е да се поларизира политичката сцена, него да се констатира дека форматот на техничка Влада или пржинска Влада како иницијално беше наречен е надминат, зошто, затоа што таков формат јас барем не познавам земја каде што главните министрества и премиерот поднесуваат оставка 100 дена во очи изборите. Мислам дека тој формат е обележје на некоја криза општествена и институционална, така да не гледам потреба за тоа, изјави Ристевски.
Техничката Влада претставува еден вид блокадата на државата повеќе од три месеци, бидејќи нејзините дејствија на еден начин и не постојат во тој период. Ристевски смета дека тоа доведува и до недоверба кај надворешниот фактор и партнерите на Македонија.
-Генерално тој формат генерира дополнително разделеност и поделеност, но истовремено гради систем на недоверба, истовремено дава една форма на потврда пред странските инвеститори и пред меѓународната заедница и останатите дека сме држава во која не владее правото. На крајот на краиштата, вие го терате министерот и неколку учесници активни во Владата кои имаат активен мандат да дејствуваат вонинституционално, а одредни да кажеме одредени повереници бидат дел од Владата, изјави Ристевски.
Актуелниот закон за Влада, кој го предвидува овој модел беше донесен по договорот потпишан во Пржино на втори јуни 2015-та година. Со истиот се предвидува дека на 100 пред одржување на парламентарни избори државата добива технички премиер, а на предлог на опозицијата се назначуваат министри за внатрешни работи и труд и социјала, додека пак најголемата опозициска партија добива и неколку дополнителни заменик министерски места.
Пред одржувањето на последните парламентарни избори и од СДСМ кажаа дека се против овој модел. Поранешниот премиер и лидер на социјалдемократите Димитар Кочаевски кажа дека ваквиот закон бил донесен во други специфични услови во државата кои веќе ги немало.
Матеја Петровски
