Денеска, во срцето на Ватикан, со свечена литургија во базиликата Свети Петар, се одбележува Велигден, најголемиот христијански празник. Илјадници верници од целиот свет се собраа да го прослават денот на Христовото воскресение, иако без лично присуство на папата Франциско, кој продолжува со закрепнување по сериозни здравствени проблеми. Наместо него, светата миса ја предводеше италијанскиот кардинал Анџело Комастри, кој во своето обраќање упати порака на охрабрување и молитва за здравјето на Светиот Отец.
„Молиме за здравјето на папата Франциск. Иако не е физички со нас, неговата духовна сила и порака на мир се присутни меѓу нас денес“, изјави италијанскиот кардинал Анџело Комастри.
Папата неодамна беше пуштен од болница по повеќенеделно лекување, но според официјални извори од Ватикан, неговите говорни и физички способности сè уште се ограничени, и лекарите препорачуваат целосен одмор.
Во Рим се проценува дека овој велигденски викенд го посетуваат над еден милион луѓе, а меѓу нив и американскиот потпретседател Џејмс Доналд Венс, кој присуствуваше на мисата со своето семејство.
„Овој ден за мене и моето семејство има длабоко значење. Присуството овде е благослов и потсетник на вредностите кои не обединуваат“, изјави потпретседателот на САД, Џејмс Доналд Венс.
А додека светот го слави воскресението на Христос, пристигна и веста за привремено примирје меѓу Русија и Украина во чест на Велигден. Двете страни се согласија на прекин на огнот, поттикнати од меѓународни апели за мир. Велигденското примирје треба да трае до вечерва на полноќ по локално време.
Велигден 2025, велат од Ватикан, не е само празник на надеж, туку и симбол на можноста за обновување на човештвото. Пораката е јасна, да воскресне и мирот, не само Христос.
