Градежните инспектори и поранешните градоначалници на Кочани тврдат дека пожарот во „Пулс“ не се случил поради нивни пропусти и негираат вина. Тројцата општински градежни инспектори од Кочани пред судскиот совет изразија жалење и сочувство до семејствата, но и останаа на ставот дека причината за пожарот е употреба на пиротехника, а не пропуст во градежната конструкција на дискотеката. Не добиле никаква пријава или наредба да извршат инспекција Нивните бранители предложија и нови докази. Во судница ќе донесат и сведоци кои ќе појаснат кои се надлежностите на градежната инспекција, но ќе приложат и ново вештачење кое треба да ги даде сите одговори поврзани со локалот, неговато реновирање и пренамена.
Поранешниот градоначалник на Кочани, Ратко Димитровски исто така тврди дека е невин. Во неговото сведочење потенцираше дека уште кога дознал дека ќе се отвара дискотека во 2012, пратил допис до Министерството за економија, но никогаш не добил одговор. Неговата одбрана истакна дека општината не е надлежна за лиценците и за контрола на дискотеките, обвинетиот не одобрил пренамена на објектот, а немал ниту ингеренции да контролира дали се применува пиротехника, па не може да биде виновен. Никогаш во животот не сум помислил дека ќе застанам на обвинителна клупа за нешто што единствено јас пред 13 години сум бил против, подвлече екс градоначалникот.
И екс градоначалникот Љупчо Папазов кој си поднесе оставка од морални причини негира вина и вели дека кобниот ден направил се што треба. Ја мобилизирал општината во интерес на истрагата и си поднел оставка. Тврди дека е невин, а најави и докази коишто според него на многумина нема да им се допаднат, но се во интерес на судската постапка.
Пред почетокот на судењето, родителите на загинатите ги пречекаа обвинетите со голем транспарент и фотографии од жртвите. Две мајки им порачаа на обвинетите дека иако тие се изјаснија за невини, транспарентот сведочи за нивната вина.
Судењето продолжува наредната недела со воведни зборови на обвинетите и нивните адвокати.
