Во Лондон, британскиот министер задолжен за Европа и Северна Америка, Стивен Даути, ја истакна посветеноста на Обединетото Кралство и Северна Македонија кон: продлабочување на партнерството во рамки на НАТО, справување со нерегуларната миграција, зајакнување на трговските врски.
Ова беше објавено на Платформата X по средбата на Даути со вицепремиерот Александар Николоски.
На состанокот се разговараше за економската и политичката соработка, со посебен акцент на инфраструктурните инвестиции кои ќе поттикнат економски раст и развој на Македонија.
Британскиот амбасадор во Скопје, во посебна објава на истата платформа, ја потврди стратешката соработка меѓу двете земји во НАТО.
Во пресрет на Самитот на Берлинскиот процес, Северна Македонија и Обединетото Кралство интензивно работат на создавање амбиент за заемен економски раст и зајакната безбедност. Во рамки на посетата, Николоски оствари и неколку други средби, меѓу кои со: Гарет Томас, министер за услуги, мали бизниси и извоз, претставници на британската агенција за извозно финансирање (UKEF), претставници на Министерството за надворешни работи на Обединетото Кралство (FCDO).
Од двете страни беше нагласено дека унапредувањето на НАТО-партнерството и збогатувањето на трговските односи се стратешки приоритети за претстојниот самит.
