Директорот на Дирекцијата за Технолошки индустриски развојни зони (ТИРЗ) Гоце Димовски денеска ги посетил ТИРЗ Тетово и ТИРЗ Кичево, каде имал средби со приватниот партнер „Нормак“, менаџментот на компанијата „Џаво Отомотив“ и менаџментот на компанијата „Џојсон Сејфти Системс“.
Прес-службата на Дирекцијата на ТИРЗ соопшти дека во ТИРЗ Тетово, Димовски и генералниот директор на „Нормак“, Александар Зарков, ги разгледале тековните активности во зоната, можностите за понатамошен развој на инфраструктурата, како и мерките за подобрување на условите за работа. Димовски се сретнал и со менаџментот на „Џаво Отомотив“, при што исто така биле разгледани тековните активности поврзани со реализација на инвестицијата, како и следните чекори во развојот на компанијата во рамки на ТИРЗ Тетово.
Посетата продолжила во ТИРЗ Кичево, на средба со менаџментот на „Џојсон Сејфти Системс“ на која се разговарало за досегашното работење на компанијата, тековните активности и плановите за понатамошен развој. – Притоа, беа разгледани и можностите за дополнителна поддршка од страна на Дирекцијата во насока на олеснување на работењето и реализација на идните развојни планови на компанијата – соопшти Дирекцијата на ТИРЗ.
Потенцираат дека денешната посета на ТИРЗ Тетово и ТИРЗ Кичево е дел од континуираната определба на Дирекцијата за ТИРЗ за директна комуникација со инвеститорите и партнерите и следење на состојбите на терен.
– Главната цел и натаму останува навремено идентификување на потребите на компаниите, унапредување на условите за работа и создавање предуслови за нови инвестиции и отворање нови работни места – велат од Дирекцијата на ТИРЗ.
