Министрите за дигитална трансформација и за здравство, Стефан Андоновски и Сашо Клековски, денеска реализирале работна средба на која се разговарало за пациентите, граѓаните и компаниите во државата.
– Понеделничка брза работна средба со почитуваниот министер за здравство Сашо Клековски. Дефинирани приоритети во рамки на нашата соработка, фокус на резултати за пациентите, граѓаните и компаниите за поефикасна работа на администрацијата – напиша Андоновски на Фејсбук.
Клековски информираше дека на средбата станало збор за стратегијата за дигитално здравство, забрзување на тековните проекти – пред сè – е-бебе, почеток на дигитализација на услугите на Министерството за здравство.
– Дигитализацијата не е цел сама по себе. Таа е услов за продуктивност – помалку време на шалтер и во администрација, повеќе време за пациентот. И за транспарентност – постапка што е електронска е и следлива. Му благодарам на министерот Андоновски за соработката. Продолжуваме со конкретни чекори – напиша Клековски на Фејсбук.
