Илинден е најголемиот македонски национален празник и еден од најсветлите симболи на нашата историја, државност и национален идентитет. Двата Илиндена – 2 август 1903 година, кога започна Илинденското востание, и 2 август 1944 година, кога се одржа Првото заседание на АСНОМ – се темелите врз кои е изградена современата македонска држава. Тие не се само историски датуми, туку вечни светилници што нè потсетуваат на цената што е платена за нашата слобода, достоинство и државност, се наведува во честитката од СПМ, што МИА ја пренесува интегарлно.
Со длабока почит и благодарност им оддаваме признание на илинденците, на борците од Народноослободителната борба и на сите генерации кои со својата пожртвуваност, храброст и љубов кон татковината ги поставија темелите на независна и суверена Македонија.
Нивниот подвиг нè обврзува денес да бидеме единствени, одговорни и посветени во градењето на држава во која владеат демократијата, правото, солидарноста и еднаквите можности за сите граѓани. Само со заемна почит, меѓусебна доверба и заедничка работа можеме да обезбедиме стабилна, просперитетна и сигурна иднина за Македонија.
Илинден не е само сеќавање на славното минато, туку и силна инспирација за иднината. Во време на нови предизвици, нашата најголема сила остануваат единството, сплотеноста и љубовта кон татковината. Само обединети можеме да создадеме посилна, поправедна и поуспешна Македонија за сегашните и идните генерации и да го заштитиме и сочуваме македонскиот народ од недобронамерните посегања однадвор.
Со благодарност кон нашите предци и со непоколеблива вера во иднината, да продолжиме достоинствено да ја чуваме, развиваме и унапредуваме нашата татковина, следејќи ги идеалите на илинденците и асномците.
Честит и вековит нека е Илинден – Денот на Републиката!
За вечна, обединета и просперитетна Македонија!
