Положбата и актуелните предизвици со кои се соочуваат помалубројните заедници во Македонија, како и можностите за натамошно унапредување и заштита на нивните права преку засилена институционална соработка, биле во фокусот на денешната средба на директорот на Агенцијата за остварување на правата на заедниците Далибор Китановиќ, со политичкиот советник во Амбасадата на САД, Ендру Ковтун, и економската советничка Розита Мреношки.
Агенцијата за остварување на правата на заедниците информира дека посебно внимание било посветено на можностите за продлабочување на соработката со Амбасадата на САД преку заеднички иницијативи, активности и проекти насочени кон унапредување на меѓуетничкиот дијалог, почитувањето на различностите и зајакнувањето на општествената кохезија.
Во соопштението, Агенцијата изразува благодарност до претставниците на Амбасадата на САД за, како што наведуваат, конструктивниот разговор, покажаниот интерес за прашањата од значење за помалубројните заедници и подготвеноста за продолжување и унапредување на меѓусебната соработка.
