Собраниската Комисија за земјоделство, шумарство и водостопанство одлучи предлогот на закон за изменување и дополнување на Законот за земјоделство и рурален развој во прво читање да ја продолжи собраниската процедура за негово донесување.
Предложените измени на законот обезбедуваат правна сигурност, вледеење на правото и модерно електронско управување, и за спроведување на законот не се потребни дополнителни финансиски средства, посочија од Министерството за земјоделство, шумарство и водостопанство, предлагачи на измените и дополнувањата на Законот за земјоделство и рурален развој.
– Во законското решение се уредува планирањето на земјоделството и риралниот развој, директните плаќања во земјоделството и руралниот развој и уредувањето на земјоделските пазари. Доволно е во овој контекст да се спомнат целите на националната аграрна политика, а тоа е да се обезбеди квалитетна храна по пристапни цени за сите наши граѓани, да се зголеми конкурентноста на земјоделското производство, да се обезбеди стабилен доход за земјоделските производители, одржлив развој на руралните средини и искористување на сите потенцијали во нашата држава и притоа да се заштити животната средина и природата, истакна пратеникот Златко Пенков, член на комисијата.
Според Љупчо Николовски, претседател на Комисијата за земјоделство, шумарство и водостопанство во предложениот текст има технички грешки и недоследности кои ќе треба да ги корегира законодавно правната комисија.
– Суштина на самата измена во законот и сега треба да се направи е основ за ограничување на исплата на субвенции, односно максималниот износ на субвенции по корисник. Тоа е суштината на законот за што е потребно дополнително образложение, нагласи пратеникот Николовски.
Предлогот за изменување и дополнување на Законот за земјоделство и рурален развој во прво читање продолжува во следна собраниска фаза на која се очекуваат амандмани за подобрување на текстот на законот, заклучија членовите на собраниската Комисија за земјоделство, шумарство и водостопанство.
