„Се исправам овде со намера да го нарушам нормалниот тек на работа во Сенатот на САД и ќе останам стоејќи додека сум физички способен. Се исправам вечерва, бидејќи искрено верувам дека нашата земја е во криза“, изјави тој вчера на почетокот на својот маратонски говор.
Обраќањето на сенаторот од Њу Џерси го урна рекордот од 1957 година, поставен од Стром Тарман – сенатор од Јужна Каролина, поддржувач на расната сегрегација, кој се спротивставуваше на историскиот закон за граѓанските права и зборуваше во пленарната сала 24 часа и 18 минути.
Симболично, малку пред да го надмине овој рекорд, Кори Букер со емотивен и изморен глас ги потсети на зборовите на еден од неговите ментори – Џон Луис, емблематична фигура на движењето за граѓански права од 60-те години.
Сенаторот го искористи слоганот на поранешниот демократ во Конгресот, кој почина во 2020 година, за да ги повика Американците да предизвикаат „немири, добри немири“ во општеството како одговор на политиките на Доналд Трамп.
„Овде не станува збор за лево или десно. Ова е прашање на добро и зло. Америка, ова е морално прашање: дали Уставот живее во твоето срце?“, изјави сенаторот малку откако го постави новиот рекорд.
Тој го предаде зборот во 20:05 часот по локално време, по што зборуваше 25 часа без прекин.
Кори Букер започна да зборува во американскиот Сенат од претходната вечер во 19:00 часот, протестирајќи против политиката на претседателот Трамп, која според него е „неуставна“.
Интерниот правилник на Горниот дом на Конгресот му дозволува на секој сенатор да земе збор, сè додека стои исправен и зборува без прекин. Оваа тактика се нарекува „филибастер“ – збор што потекнува од францускиот „flibustier“ (пират, кој дејствувал крај американските брегови од 16-ти до 18-ти век), бидејќи сенаторот ја „киднапира“ говорницата и го спречува затворањето на дебатите.
Правилата се строги: не е дозволено седење или пауза, дури ни за физиолошки потреби. Единствената дозволена пауза е за време на гласање – кога друг сенатор може да земе збор за да постави прашање на говорникот, понекогаш пролонгирајќи и самото прашање.
