70 денари за еден час паркирање во центарот на Скопје. Од денеска за 20 денари поскапува паркирањето во Центар и ќе се плаќа во зависност од зоната, велат од ПОЦ.
Поскапувањето се однесува само на паркирањето од час, додека цените за месечниот билет, дневната паркинг карта и останатите услуги на ПОЦ остануваат исти.
Граѓаните поделени. За едни било добро што цената оди на горе, зашто центарот буквално се задушил од возила, за други не било добро што се удира по џебот на граѓаните.
– За тие што идат од другите општини 70 денари е многу, но за центарци и оваа сума е малку, зашто колите уште малку и дома ќе им влезат, велат скопјани пред камерата на Алфа.
Но има и такви кои велат дека што и да направат градските власти, паркирањето во Центар немало никогаш да се реши.
– Што сакаат нека направат, центарот и паркингот никогаш нема да го средат, тоа е катастрофа, страшно е, велат дел од граѓаните.
Општинското претпријатие за паркирање почнува со нова кампања за подигнување на јавната свест под слоганот „Центар не е паркинг“. Градските власти велат дека со овие видео пораки сакаат да апелираат до граѓаните да користат алтернативни начини на превоз.
– Луѓето не сакаат да се занимаваме само со казнена политика, со санкционирање, затоа се радувам што се започнати редовни кампањи, обуки пред се од мали нозе на луѓето кои допрва ќе станат возачи, за што помалку да ги користат возилата пред сѐ“, рече Саша Богдановиќ, градоначалникот на општина Центар.
– Општина Центар не може да ги прими сите возила, не само на жителите на Скопје туку и на граѓаните од другите градови. Трендовите за зголемување на паркирани возила во центарот на градот се зголемуваат. Не можеме да дозволиме сите да се паркираат во Центар. Затоа решивме да ја зголемиме цената на паркирањето за 20 денари од час. Се надеваме на тој начин ќе ги дестимулираме граѓаните да користат автомобили, вели Васко Кичевски, директорот на ПОЦ.
Зголемувањето на цената на паркингот е во насока да се стимулираат граѓаните, наместо со автомобил, до центарот на градот да доаѓаат со градски превоз.
Борис Грујоски
