Со нов закон до модерна и европска администрација. Владата работи на решение кое треба да обезбеди професионална и поефикасна администрација во функција на граѓаните и економијата. Сите административци ќе поминат стручно усовршување и обука со цел да се обезбеди систем што ќе се потпира на професионалци, знаење и транспарентност. Министерот Минчев, порача дека реформата која се прави е од суштинско значење за државата и го поставува темелот на модерна и европска администрација
„За првпат во историјата на нашата држава, системски и институционално ги регулираме стручните обуки на државните службеници. Академијата ќе понуди структуиран систем на обуки, разовј на компетенции и континуирано учење. Секој административен службеник, од најмладиот до најискусниот, ќе има можност да се надоградува да стекнува нови знаења и да го покаже својот професионален капацитет“, изјави министерот за јавна администрација, Горан Минчев.
Во целиот процес, партнер е Франција која ја поддржува оваа иницијатива преку проект за формирање на Академијата, планирана за 2027 година. Францускиот амбасадор во земјава Кристоф Ле Риголер, ја потврди поддршката од Франција за реформите, и нагласи дека модернизацијата на администрацијата е клучна не само за европската интеграција, туку и за граѓаните.
Изјава: Кристоф Ле Риголер – амбасадор на Франција во Македонија:
„Честопати велиме дека реформата на јавната администрација е суштината за евроитегративниот процес и велз во европската унија. Односно тоа е еден од критериумите, за отворање на кластерот еден од европското законодавство. И уште еднаш ќе повторам дека Франција ви стои на располагање за оваа цел.“
Од Центарот за управување со промени велат дека вистинската реформа почнува кога институциите ќе ја изградат културата на учење и вложување во знаење. Директорката Сачмароска предупреди дека обуките често се гледаат како формалност, а не како инвестиција.
„Македонската администрација има добри намери и квалификувани кадри, но, се уште се соочува со култура која не го вреднува доволно учењето, обуките често се гледаат како на формалност, а не како во инвестиција за подобрено управување“, изјави Неда Малеска Сачмароска – извршна директорка на ЦУП
Во 2027 година ќе стартува работата на Академијата за јавна администрација преку која секој нов административец ќе помине 120 часа обука и ќе полага испит пред стручна комисија.
