Градоначалникот на Општина Кочани Владко Грозданов денеска ги прими во посета амбасадорот на Република Словенија, Грегор Прескер и претседателката на Здружението „Дијалог“, Јасмина Бошевска, со кои разговараше за текот на реализацијата на проектот „Вештини – клучот на зелената економија“ што се реализира во Кочани со поддршка на Амбасадата на Словенија и словенечкото Министерство за надворешни и европски работи.
Проектот, преку собирање билки и дизајнирање билни градини вклучува едукативни активности во училишната градина на ООУ „Св. Кирил и Методиј“, обуки на млади невработени луѓе, настрадани во трагедијата во „Пулс“ и заинтересирани граѓани. Учесниците се обучуваат за стекнување вештини поврзани со билки и шумски плодови, дизајн на домашни градини и за едукација за капацитетите на природата.
На средбата беа истакнати придобивките од проектот: развој на вештините кај младите за економско и социолошко зајакнување, развој на претприемачките капацитети преку поврзување со природното, традиционалното и културно наследство и развој на зелената економија.
