Скопје може повторно да остане без автобуск и превоз. Од Град Скопје се пожалија дека главниот снабдувач со горива за автобусите на ЈСП, компанијата „Пуцко петрол“, ја прекинала испораката на нафта. Но, во соопштението, нема детали дали тоа значи дека од денеска или од утре ќе престанат да возат автобусите на ова јавно претпријатие.
„Под силен политички притисок, уценетиот Асмир Јахоски од „Пуцко петрол“ се приклучува на обидите за креирање хаос во Скопје. Иако има активен договор со ЈСП за испорака на нафта, Асмир Јахоски од „Пуцко петрол“, соочен со обвиненија, затворска казна и подложен на уцени, ја прекина доставата“, се вели во соопштението од Град Скопје.
Од таму најавија дека ќе поведат и постапка за материјална и кривична одговорност против Асмир Јахоски и „Пуцко петрол“.
Инаку, Јахоски е осомничен во врска со истрагата за набавка на мазут за ТЕЦ Неготино, а за да не оди во притвор тој даде гаранција со ставање хипотека на имот во износ од 986 илјади евра и готовина во износ од 1,17 милиони евра. Истовремено му се определуваат мерки на претпазливост – одземање на патна исправа и јавување во судот.
