Драматично растат цените на нафтата како последица на ескалацијата на американско-израелската војна со Иран.
Трамп порачува дека зголемувањето на цената на нафтата е мала цена што треба да се плати за светскиот мир и безбедност.
„Краткорочните цени на нафтата, кои брзо ќе паднат откако ќе се заврши уништувањето на иранската нуклеарна закана, се многу мала цена што треба да се плати за Соединетите Американски Држави, светот, безбедноста и мирот. Само будалите би размислувале поинаку“, рече Трамп во објава на мрежата Truth Social.
Аналитичарите предупредуваат дека, ако блокадата на Ормускиот Теснец би траела до крајот на март, може да се очекуваат рекордни цени на нафтата над 150 долари за барел. Околу една петтина од светските резерви на нафта се пренесуваат токму преку овој теснец.
Министрите за финансии на групата Г7 на итен состанок ќе ја разгледаат можноста за заедничко ослободување на нафта од стратешките резерви, во координација со Меѓународната агенција за енергија. Целта е да се запре наглиот пораст на цените на нафтата поттикнат од конфликтот во Заливот.
Земјите членки на Европската Унија имаат доволно резерви на нафта и гас и покрај нарушените синџири на снабдување поради војната на Блискиот Исток, порачаа од Европската комисија.
Мишко Ливрински
