Откако целиот свет го крена на нозе со својата одлука, Доналд Трамп најави 90-дневна пауза на царините за повеќето земји, освен Кина, дополнително зголемувајќи ги давачките за увоз од таа земја на 125 отсто. Иако претходно со денови инсистираше дека ќе остане цврсто на својата агресивна трговска стратегија, Трамп вчера изненадувачки објави дека сите земји кои не возвратиле на американските царини ќе добијат одложување – и ќе се соочат само со сеопфатна американска царина од 10 отсто – до јули. Кога новинарите го прашаа зошто наредил пауза, американскиот претседател одговори: „Луѓето малку станаа нервозни“. „Повеќе од 75 земји“ ја контактирале американската федерална влада „за да преговараат за решение“. Сепак, Трамп се задржа цврсто на плановите да го таргетира Пекинг. Претходно Кина објави царини од 84 отсто на увозот од САД. Пекинг вети дека ќе се бори до крај. Весникот „Чајна Дејли“ синоќа објави дека попуштањето пред американскиот притисок не доаѓа предвид.
Веднаш по веста за одложувањето на американските царини, берзите пораснаа. Тајванската берза забележа раст од 9,2% утрово, јапонскиот индекс Никеи порасна за 7,2%, а јужнокорејскиот Коспи за повеќе од 5%. Австралиската берза оствари скок од над 6%.
Индексот Даун на Вол Стрит порасна за речиси 8% по објавата на Трамп, а технолошкиот индекс Насдак за 12,2%, што му е најдобриот ден во последните 24 години.
Претседателката на Европската комисија, Урсула фон дер Лајен, ја поздрави одлуката на американскиот претседател Доналд Трамп да ги паузира „реципроцните“ царини на 90 дена, нагласувајќи дека ЕУ останува посветена на конструктивни преговори со Соединетите држави, со цел да се постигне непречена и заеднички корисна трговија.
