По сомнежите за криминал со јавните набавки и неисправните автобуси, синдикатот на ЈСП тврди дека веќе поднел пријави до Јавното обвинителство, но дека тие со месеци стојат во фиока. Дополнително, најавуваат дека во следните денови ќе достават нови материјали и до Финансова полиција, со кои, како што велат, ќе се потврдат сериозни неправилности во работењето на претпријатието.
„Ние веќе имаме поднесено пријави до Јавното обвинителство, но тие, за жал, стојат во фиока. Во ЈСП има сериозни пропусти и небрежност. Сега подготвуваме дополнителна документација која ќе ја доставиме и до Финансова полиција, за да видиме конечно дали некој ќе се охрабри да постапи.“
Од ОЈО засега немаме одговор дали се постапува по поднесените кривични пријави. Синдикатот на ЈСП бара институциите конечно да ги испитаат сомнежите за криминал со тендерите за гориво и резервни делови за автобусите. Велат дека имаат сериозни сомнежи кои укажуваат на можни злоупотреби во процесот на јавните набавки, но и на набавка на гориво со сомнителен квалитет, поради кое, според нив, биле расипани повеќе од триесет возила.
Откако синдикатот за овие наводи зборуваше јавно, и од Финансова полиција излегоа со став дека ќе постапат штом ги добијат официјално материјалите. Од Финансова ги повикаа синдикалните претставници да ги достават сите документи. Во меѓувреме, состојбата во јавниот превоз останува критична. Дел од автобусите не се во функција, а возачите велат дека секојдневно се соочуваат со расипани автобуси и недостаток на резервни делови.
