Претседателката вчеравечер присуствуваше на официјалниот прием за шефовите на делегациите што го приредија шпанскиот крал Фелипе VI и кралицата Летиција во кралската летна резиденција, дворецот Алказар де Севиља.
Претседателката Гордана Сиљановска-Давкова ја предводи македонската делегација која денеска учествува на 4. Меѓународна конференција за финансирање на развојот во Севиља што се одржува под покровителство на Обединетите нации. Во друштво на претседателката се и министерката за финансии Гордана Димитриеска-Кочоска и заменик-министерката за животна средина Ане Лашкоска.
Предвидено е Сиљановска-Давкова да се обрати на пленарната сесија на конференцијата.
Претседателката вчеравечер присуствуваше на официјалниот прием за шефовите на делегациите што го приредија шпанскиот крал Фелипе VI и кралицата Летиција во кралската летна резиденција, дворецот Алказар де Севиља.
„Во срдечна атмосфера се водеа инспиративни разговори, во духот на заемна почит и разбирање. Приемот се одржа во пресрет на 4. Меѓународна конференција за финансирање на развојот под покровителство на ОН, којашто ја нагласува потребата за одржлив развој, правичен пристап до финансиски ресурси и зајакнување на глобалната солидарност. Искрена благодарност до домаќините за можноста да размениме мислења за клучните предизвици на нашето време“, напиша Сиљановска-Давкова во објава на Фејсбук.
Целта на лидерскиот собир во Севиља е изнаоѓање решенија за справувањето со финансиските предизвици во исполнувањето на целите за одржливиот развој и Агендата 2030, реформирање на меѓународната финансиска архитектура и поттикнување на инвестиции од страна на приватниот сектор. На конференцијата треба да биде усвоен заеднички документ „Договорот од Севиља“.
