Претседателката Гордана Сиљановска-Давкова денеска ја посети базиликата Санта Марија Маџоре, во рамки на престојот во Рим по повод чествувањето на 24-ти Мај – Денот на сесловенските просветители.
Во базиликата таа положи венец пред спомен плочата на македонски јазик во чест на делото на Светите браќа Кирил и Методиј и оддаде почит на гробот на Неговата светост, папата Франциск.
Претседателката, по посетата изјави дека е инспиративно да прочитате на македонски јазик, покрај на другите словенски јазици, дека без делото на Кирил веројатно тешко би се просветиле, бидејќи тој е носителот, промоторот на писменоста, а без писменост не можете ни умот, ни мислите да ги изразите.
За неодамна починатиот папа Франциск, со кој Сиљановска-Давкова, минатата година во Рим долго разговараше, нагласи дека тој ќе остане запаметен по неговата посветеноста, ерудиција, по блискоста до граѓаните, верниците, по длабоката верба во Бога, во мирот, човек посветен на обичните и на сиромашните.
