Претседателката Гордана Сиљановска-Давкова престојува во работна посета на Дубаи, Обединетите Арапски Емирати, каде ќе учествува на Светскиот самит на владите.
Промената во светот бара промена во образованието, гледање на реалноста низ очите на новите генерации, рече претседателката во своето обраќање на Светскиот самит на лауреати, што се одржува во пресрет на Светскиот самит на владите. На еминентниот собир, на којшто учествуваат околу 150 врвни научници, вклучувајќи Нобеловци и лидери на истражувачки институции од целиот свет, Сиљановска-Давкова посочи дека во време на подем на вештачката интелигенција, образованието повеќе не е едносмерна улица на пренесување и помнење на факти и посочи на потребата фокусот на образованието да се префрли на критичко и креативно размислување.
„Вештачката интелигенција е дел од новиот модел на образование. Таа не може и не треба да биде забранета. Сепак, тоа треба да се регулира, бидејќи носи бројни ризици, меѓу кои е зависноста“, рече претседателката.
Дел од македонската делегација е и министерот Тимчо Муцунски. По пристигнувањето таму, тој се сретна со Македонци кои живеат и работат во Обединетите Арапски Емирати – успешни професионалци кои со своето знаење и искуство даваат значаен придонес за локалната економија. На средбата беше разговарано и за потенцијалот за продлабочување на соработката меѓу Република Македонија и Обединетите Арапски Емирати, со фокус на економијата и трговијата, како и за улогата и придонесот на дијаспората во овој процес.
