Практичната настава за секој студент е клучна во образовниот процес. Волонтирајќи, им се овозможува да стекнат конкретни вештини, но и да се подготват за пазарот на труд, вели Искра Апостолова, студентка од трета година на Правниот факултет, при УГД. Таа е дел од првата група што ќе волонтира во Општина Штип. Од УНДП, посочуваат дека ваквите програми ја зголемуваат конкурентноста на младите и го намалува одливот на кадар, мотивирајќи ги да останат и да градат кариера дома.
„Праксата верувам дека е клучна за секој студент, особено во периодот додека студираме. Ќе ја поткрепиме теоријата што ја знаеме и претпоставувам дека секој студент сака одблизу да види како функционира Локалната самоуправа и кои се нејзините предизвици“, изјави Искра Апостолова, студент на УГД“,
„На еден начин да помогнеме во процесот на спречување на одлевање на умот и образованиот кадар од државата, односно што повеќе млади луѓе да се задржат во државата со стекнување на практични искуства и започнување веднаш во работниот процес“, изјави Драган Ристовски, од УНДП.
Студентите од Правниот, Економскиот и Факултетот за образовни науки ќе волонтираат три месеци, по четири часа, три дена во неделата. За својот ангажман ќе добиваат надомест од 6000 денари. Во наредниот период се прават напори програмата да се прошири и да вклучи други факултети и институции.
„Со проектот сакаме да ги отвориме вратите на општината, да го покажеме принципот на работа и истите да се стекнат со предзнаења и да бидат подготвени за моментот кога ќе почнат со нивното официјално вработување“, изјави Вишна Шорова Ангелова, секретар на Општина Штип.
„Она што е битно, разговараме понатаму оваа програма да биде проширена и во делот на техничките факултети согласно барањата и потребите на општината“, изјави проф. Дарко Лазаров.
Во првиот циклус ќе бидат вклучени девет студенти, а се планира програмата да биде понудена на други општини и универзитети.
