Универзитетот „Гоце Делчев“ (УГД)- Штип денеска и утре е домаќин на истражувачка мисија, на кој присуствуваа сите девет универзитети во рамките на Европската универзитетска алијанса (ACE2EU). Проректорот на УГД-Штип, Ана Никодиновска-Крстевска вели професорите од Алијансата учествуваат во креирање на идни едукативни можности кои во наредниот период ќе бидат дел од редовната настава.
-Идејата беше, затоа што се соочуваме со многу предизвици во последно време, решивме дека ова за нас е една актуелна тема која би сакале да ја дискутираме, вели Никодиновска Крстевска.
Ректорот на УГД-Штип, Дејан Мираковски појасни дека темата на настанот беше безбедно и инклузивно општество, кое ќе ги покрие безбедноста и сигурноста на населението од сите аспекти. Целта е преку разни активности да се дојде до заеднички додипломски студии и еден универзитет за сите студенти.
-Почнуваме од кратки обуки, летни школи, а треба да завршиме со зеднички додипломски студии, изјави Мираковски.
На настанот присуствуваа и професори од други универзитети и држави кои придонесоа за реализација на овој проект.
Денешната истражувачката мисија на Европската универзитетска алијанса (ACE2EU) е од големо значење и за Штип, вели градоначалникот на Општина Штип, Иван Јорданов, бидејќи какошто посочи се отвораат нови можности за сите за помодерно и поинклузивно општество.
-Овој настан навистина ќе овозможи посилни институции, можност за создавање политики преку кои ќе се создаде и ќе се креира едно посовремено, помодерно и поинклузивно општество, рече Јорданов.
