– Општина Штип реализира пилот пропект во рамки на програмата URBACT Pioneers Accelerator, со што како што соопштија од локалната самоуправа направен е значаен чекор кон модернизирање на управувањето со отпадот преку развивање на пилот- решение кое ги поврзува дигиталната технологија, подобрата организација на собирањето и активното учество на локалната заедница.
– Општина Штип заедно со 27 градови и општини од Албанија, Босна и Херцеговина, Црна Гора, Македонија и Србија беа избрани како дел од програмата URBACT Pioneers Accelerator. Програмата е кофинансирана од Европскиот фонд за регионален развој (ERDF) со буџет од 79.769.000 евра, од Инструментот за претпристапна помош (IPA) со буџет од 5.000.000 евра и од Инструментот за соседство, развој и меѓународна соработка со буџет од 2.000.000 евра за периодот 2021–2027 година. Секоја општина доби 35.000 евра од ЕУ преку URBACT, за да се поддржи нивното учество во програмата, вклучувајќи ја и реализацијата на мали пилот-проекти кои придонесуваат кон нивните цели за одржлив урбан развој – соопштуваат од општина Штип.
Во соопштението се посочува дека пилот проектот произлегол од реалните предизвици со кои се соочува градот – преполнети контејнери, неефикасни рути за собирање, ограничени податоци во реално време и недоволно вклучување на граѓаните. Наместо отпадот да се собира само реактивно, општина Штип разви модел кој овозможува идното управување да се базира на податоци, навремено реагирање и подобро планирање.
-Како дел од пилотот, обезбедени се 10 пластични контејнери со волумен од 1,1 m³, наменети за поставување во избрани пилот-локации. За нивно паметно следење е предвидена инсталација на 10 DF703 IoT сензори, со NB-IoT/4G комуникација. Сензорите ќе овозможат следење на состојбата на контејнерите, вклучително и ниво на пополнетост, температура, наклон, состојба на батеријата и последна комуникација-велат од општина Штип.
Со ова се создава можност општина Штип и надлежните служби да добиваат навремени информации и поефикасно да го планираат собирањето на отпадот. Општина Штип веќе ја финализираше потребната техничка документација и јавната набавка, а 10-те нови контејнери се обезбедени и пристигнати. Следниот чекор е поставувањето и интеграцијата на IoT сензорите и активирањето на дигиталниот систем за мониторинг.Со ова Штип преминува од фаза на планирање кон реална имплементација на паметно управување со отпадот.
