Шестгодишно девојче од Куманово, кое вчера беше пронајдено во скопската населба Гази Баба, по грешка наместо во градски автобус се качило во автобус што сообраќал кон Скопје – соопшти денеска СВР Куманово, изнесувајќи ги деталите од случајот.
Мајката на девојчето, 28-годишната С.Т., вчера во 15:00 часот пријавила во полиција дека нејзината ќерка се оддалечила од домот. По пријавата, веднаш биле преземени мерки за пронаоѓање на детето.
„Девојчето било пронајдено на подрачјето на Гази Баба во Скопје, а по извршен службен разговор било утврдено дека девојчето најпрвин влегло во градски автобус кој превезувал патници до центарот на Куманово, а потоа, по грешка, наместо во автобус за враќање до домот, влегло во автобус кој сообраќал до Скопје, каде била пронајдена од случаен минувач,“ информираа од СВР Куманово.
Полицијата потврди дека детето е згрижено и безбедно вратено кај родителите, а случајот е документиран и третиран согласно процедурите.
