Воведување на нови програми за предучилишно образование, едносменска настава, нов модел на државна матура, нови формули за финансирање на основните и средните училишта, развој на кадровски капацитети на МОН. Едукацијата и иднината на младите во државава останува во фокусот на владините политики. Ова е дел и од новата шестгодишна стратегија за унапредување на образовниот систем.
„Оваа стратегија не не насочува кон целосно спротивна страна, не е нешто сосема ново, напротив таа е надополнување на досегашната, но ги адресира предизвиците кои досега постоеа и се осврнува на новите глобални образовни трендови. Во првите две години стратегијата ќе биде насочена кон целите кои Македонија треба да ги исполни согласно планот на раст на Западен Балкан усвоен од ЕУ.“– изјави министерката за образование Весна Јаневска.
Стратегијата е изработена со поддршка од ЕУ, УНИЦЕФ, Светска банка, УНДП, Бирото за развој на образованието, Центарот за развој на стручното образование како и Државниот испитен центар. За европските партнери, ваквиот ангажман е клучен за една земја да биде богата и да се движи кон патеката на растот.
„Германија со гордост придонесува кон унапредувањето на образованието на Македонија преку неколку клучни иницијативи со примерен фокус на демократско инклузивно образование како и развој на стручно и модели на стручно образование заедно со МОН. На локално ниво ГИЗ ги зајакнува капацитетите на регионалните центри на средно и стручно образование и основните училишта за образованието да се прилагоди кон одржливиот развој и учениците да се подготват за одржлива економија.“– изјави амбасадорката на Германија, Петра Дрекслер.
„Нашата споделена цел е да помогнеме да се обликува образовен систем во Македонија кој е инклузивен, ориентиран кон иднината и усогласен со националните развојни приоритети. Учениците од секоја возраст мораат да бидат опремени со вештините кои се потребни за климатска отпорност, за зелена транзиција и учество во современиот пазар на трудот“– изјави претставникот на УНДП, Армен Григоријан.
Стратегијата утре ќе биде објавена на ЕНЕР системот и достапна за коментари, сугестии, забелешки, пред конечното усвојување од Владата. Во изминатиов период беа реализирани голем број на проекти кои најголеми бенефити имаа младите, како бесплатни ваучери за електронски уред, бесплатен пристап до базата „Web of Science“, како и нови учебници по сите предмети за секој ученик.
