Трагедијата во Кочани прва тема на седницата за пратенички прашања. Опозицијата обвинува за наводна селективна правда и прашува зошто ниту еден функционер не поднел оставка од морални причини.
Им реплицираше лично премиерот – дециден дека никој не е над законот и дека дел од истрагата се луѓе кои се и од актуелната владејачка гарнитура, нешто што било незамисливо во времето на СДСМ и ДУИ.
Обвинувањата на истрагата се на погрешна адреса- истрагата ја води Обвинителството, а не Владата, а обвинителот е избран токму во време на минатата власт, рече Христијан Мицкоски.
Прашањата од власта се однесуваа на животниот стандард. Тие посочуваат дека затекнале опустошена држава, а сега биле обезбедени пари од државниот буџет за раст на платите.
Премиерот вели дека споредбено со минатата година платите пораснале за 9,6 отсто, а Владата работи овој процент да е повисок. Во однос на мерките за замрзнати маржи и цени кои истекуваат на крај на месецов, Мицкоски вели нема да дозволи ценовни шокови, од први мај продолжуваат засилените контроли .
Во рамки на собраниската дебата, премиерот откри и нов скандал поврзан со просторот кој го купила партијата Левица по багателна цена. Мицкоски вели дека објектот се споменува и во исказите во судскиот процес за убиството на Вања Ѓорчевска и Панче Жежовски односно дека Палевски и останатите обвинети се среќавале во штабот на партијата Десна, кој што бил во објектот „Опера хаус“ а тоа во суштина бил истиот простор за кој од Левица сега велат дека бил подрум со сутерен па затоа бил толку евтин.
