Јавниот обвинител на Република Северна Македонија Ненад Савески и претседателот на Државната комисија за спречување на корупцијата Адем Чучуљ денеска го потпишаа новиот Меморандум за соработка меѓу двете институции во следните три години.
-Како клучен дел од документот се активностите за развивање, унапредување и имплементација на системот на интегритет во Јавното обвинителство, што се спроведува со поддршка на Мисијата на ОБСЕ во Скопје. За таа цел, на потпишувањето на Меморандумот присуствуваше и шефот на Мисијата на ОБСЕ во Скопје, амбасадорот Килиан Вал, соопшти ЈОРСМ.
Согласно документот Јавното обвинителство и ДКСК, како што се наведува во соопштението, ќе формираат работна група која ќе подготви специфично дизајнирана политика за интегритет согласно уставната и законска положба, организациската поставеност и внатрешните акти на обвинителството.
Јавното обвинителство и ДКСК ќе соработуваат и за размена на искуства, консултации и стручна поддршка поврзани со воспоставување и унапредување на интерни механизми за интегритет, превенција на корупција, управување со ризици, судир на интереси и етичко постапување.
