Сериозно се тресат темелите на Европскиот фронт на ДУИ. Заминувањето на Мендух Тачи може да биде само почеток, кој ќе го следат и други пратеници. Веќе ниту кај интегративците нема сигурност дека коалицијата е сигурна. Арта Билали Зендели, вели засега била, но како ќе се делува во иднина, ќе одлучеле лидерите на партиите и самите народни избраници.
-Имам впечаток дека коалицијата Европски фронт ќе продолжи засега да делува опозициски и во полн состав. Дали се плашиме дека ќе има и други протекувања од Европскиот фронт, по тоа што го кажува постојано Изет Меџити по медиумите, мислиме дека одговорнст за тоа што се случува и што ќе се случи во Европскиот фронт, сносат лидерите на политичките партии кои што го сочинуваат Европскиот фронт и самите пратеници, изјави Арта Билали Зендели.
Мендух Тачи конечно и официјално потврди дека не е дел од Европскиот фронт, токму поради тоа и не бил на прес конференцијата на коалицијата за 100-те дена Влада. Вели бил главен преговарач со ВМРО-ДПМНЕ за евентуална коалицијата, но категорично биле одбиени.
-Сто дена се малку за да се анализира работата на една Влада. Причината зошто отсуствував на прес-конференцијата организирана од „Европски фронт“ за стоте дена од владеењето на Владата е поради тоа што јас и ДПА веќе нема да бидеме дел од Фронтот. Јас бев главен преговарач на Фронтот кога отидовме на разговори со ВМРО за оваа Влада. Беа децидни дека не соработуваат со нас затоа што сакаат да ја унапредат својата антиалбанска политика, изјави Тачи.
Според градоначалникот на Тетово и еден од лидерите во коалицијата „Вреди“, Билал Касами, заминувањето на Тачи е само почеток на распадот на коалицијата на ДУИ.
-Излегувањето на Тачи е само почеток на распадот. На ДУИ им одговара сега да започнат некои процеси како што пропагираат, затоа што со ова судство со поддршка од 2% кое е контролирано од ДУИ тие процеси така и ќе завршат. Не може да спроведеме „ветинг“ со корумпирани судии и обвинители, изјави Касами.
Со заминувањето на Тачи од Европскиот фронт, тие останаа со 17 пратеници, но проблем за Али Ахмети може да биде што 7 од нив не се од ДУИ, туку од другите коалициони партнери.
Матеја Петровски
