Долговите кои ги генерираат студентските домови, како резултат меѓу другото и на лошото менаџирање, датираат одамна. Проблемите кои со години се ставале под тепих, сега мора да ги решава оваа Влада.
Министерката за образование Јаневска обзнани дека во моментов четири студентски дома се во незавидна ситуација со големи долгови. Еден од нив е и охридскиот студентски дом „Никола Карев“, во кој поради неплатени сметки за електрична енергија, два дена студентите седат без струја. Министерството ќе помогне во решавањето на овој проблем, но ќе треба да се направат измени во начинот на функционирање на домовите, вели ресорната министерка.
„Ќе треба да ја промениме методологијата на финансирање на студентските домови, бидејќи е таа многу стара и дополнително, покрај недомаќинското работење, придонесува одредени домови да се најдат во посериозна ситуација“, вели Весна Јаневска, министерка за образование.
Директорот на охридскиот студентски дом кажа дека ЕВН ги исклучила од напојувањето со електрична енергија поради неплатен тримесечен вкупен долг од еден милион и седумстотини илјади денари.
„Проблемот со снабдувањето со електрична енергија во текот на денов добив известување дека ќе биде решен, односно со одлука на Влада ќе поминат тие средства кои што ДСЗ „Никола Карев“ ги должи на ЕВН“, вели Жарко Куциноски, директор на студентски дом „Никола Карев“.
Оние кои се нафаќаат со менаџирање на студентските домови треба многу одговорно да си ја вршат работата, оти долговите тешко се враќаат, порача министерката Јаневска. Годинава треба да се донесе и нов закон за младински стандард, во кој што меѓу другото ќе има и нов модел на финансирање на студентските домови. Инаку, Министерството за образование наследило долг од 5 милијарди денари.
