Македонија забрзано ги гради Коридорите 8 и 10. Се работи на реализацијата на најголемото ветување – поврзувањето на Коридор 10 со Коридор Струма во Република Бугарија. Вицепремиерот и министер за транспорт, Александар Николоски, вели дека на терен активностите се одвиваат со засилено темпо и најавува дека ова е една од најинтензивните фази во реализацијата на најголемиот инфраструктурен проект во државата. Според него, проектите на Коридорите 8 и 10 ќе донесат голем поттик за економијата и за регионалното поврзување на Македонија со соседните земји.
„Најголем проект е спојувањето на Коридорот 10 со Коридорот Струма во Бугарија, односно изградбата на експресниот пат кој треба да оди од Смоквица преку Валандово, Струмица, Ново Село па сè до границата со Бугарија. Веќе е завршен проектот за една траса од страна на ЈПДП, а за втората е во напредна фаза и сериозно работиме на изнаоѓање финансии. Она што беше најголемо ветување, веќе сериозно го работиме“, нагласи вицепремиерот Александар Николоски.
Освен што се градат патиштата, приоритет на Владата станува и железничкото поврзување со Бугарија. Директорот на „Македонски железници – Инфраструктура“, Синиша Ивановски, објави дека е пробиен претпоследниот тунел на железничката делница од Бељаковце до Крива Паланка.
„Добро е кога на крајот од тунелот ќе се појави светло. Го пробивме претпоследниот од вкупно 15 тунели на железничката делница од Бељаковце до Крива Паланка. Ова е вториот дел од градбата на пругата кон Бугарија. Градбата на оваа траса изобилува со предизвици, а еден од поголемите е пробивањето и изградбата на тунелите“, вели Синиша Ивановски, директор на Македонски железници.
Тендерот за третата фаза од железничкото поврзување со Бугарија ќе биде објавен во овој месец или јануари – најави Николоски. Тој во ноември, со бугарскиот министер Караџов го потпишаа договорот за подготовка и изградба на меѓуграничниот железнички тунел на Коридорот 8, со што двете земји ги утврдија обврските за реализација на овој стратешки проект.
Владата најавува засилен интензитет на инфраструктурните инвестиции кои треба значително да ја подобрат поврзаноста и економијата во наредниот период. Капитални проекти во вредност од 660 милиони евра влегуваат во фокусот на државата, со посебен акцент на забрзаната изградба на Коридор 8 и поттикнувањето на регионалниот развој.
