За првпат општините и градоначалниците ќе можат на едно место да побараат и добијат помош, насоки и експертска поддршка за реализација на проектите. Владата го промовираше новиот Ресурсен центар, тело што треба да ја олесни работата на локалната самоуправа и да ги подобри услугите за граѓаните. За министерот Перински, ова е конкретен одговор на долгогодишните проблеми што ги кочат општините. Замислата е центарот да биде мост помеѓу општините и централната власт.
„Овој ресурсен центар ќе ги канализира и сите оние донаторски средства кои што се влеваат во Македонија, а се насочени кон помош и поддршка и регионалниот развој. Ќе се креираат предлог решенија во делот на дигиталните алатки, ќе се креираат брошури, практични брошури кои што би требало на градоначалниците да им дадат еден концепт една можност одблиску да се запознаат со процесите кои што ги чекаат во нивните градоначалнички мандати“, изјави министерот за локална самоуправа Златко Перински.
За премиерот Мицкоски центарот претставува значајна додадена вредност за ефективно спроведување и реализација на проектите кои веќе се реализираат со парите од поволниот унгарски кредит. Преку него ќе се обезбеди и клучна поддршка во надзорот и ќе биде од голема помош во следењето на резултатите, и обезбедување на брзо и квалитетно носење на одлуки.
„Затоа, сакам да упатам јасна порака до секој градоначалник, без разлика дали води голема урбана општина или мала рурална заедница: разгледајте ги можностите кои ги нуди Ресурсниот центар, користете ја поддршката, побарајте експертска помош таму каде што постојат предизвици или недостиг на капацитети. Ова не е слабост – ова е мудрост во управувањето.“, изјави премиерот на Македонија, Христијан Мицкоски.
Во креирањето на ова значајно тело, покрај Владата и Министерството за локална самоуправа, работеле и голем број експерти и донатори. Центарот е конципиран како институционален механизам кој ќе овозможи долгорочна, одржлива и стручна поддршка за општините во државава, преку обезбедување специјализирани услуги во областа на административниот менаџмент, планирањето на локалниот и регионален стратешки развој, подготовка на техничка документација и капитално и финансиско планирање и управување, техничка експертиза, јакнење на меѓуопштинската соработка, подготовка на проектни апликации и искористување средства од меѓународни фондови.
