СДСМ обвинува дека предлогот на претседателката Силјановска Давкова за гувернер на НБРМ бил „теснопартиски“. Забораваат дека претседател на политичка партија, претходничка на нивната СДСМ, во 2004 беше назначен за гувернер на НБРМ непосредно по вршењето на функцијата министер за финансии во влада предводена од СДСМ. Господинот Петар Гошев, кој, исто така, претходно бил пратеник во Собранието на Македонија во два собраниски состави, остана на гувернерската позиција цели 7 години, соопшти ВМРО-ДПМНЕ.
Исто така, сакаме да ги потсетиме СДСМ дека професорот Трајко Славески своевремено во раните 1990-ти години остро го критикуваше грабежот на општествениот капитал што го изврши тогашното раководство на СДСМ, во полза на македонските олигарси. Со тоа стотици илјади работници останаа без работа и без средства за егзистенција. Во тој период, штитејќи ги правата на работниците за праведна приватизација, професорот Славески беше неформален советник на тогашното раководство на Сојуз на синдикатите на Македонија. Синдикалното гласило „Трудбеник“ во 1995 година го прогласи за „економист на годината“, нотираат од ВМРО-ДПМНЕ во реакцијата на соопштение на СДСМ.
Професорот Славески секогаш се залагал за унапредување на општиот интерес и бил во служба на напредокот на Македонија, наспроти интересите на тесни групи за интерес.
