СДСМ синоќа одржа седница на централниот одбор на партијата. Се разговарало за актуелните состојби во земјата по најтешката трагедија која што ја погоди Македонија и во која згаснаа 59 животи, соопштуваат од партијата. Заклучок на централниот одбор на СДСМ е дека досегашниот тек на истрагата покажува дека се води селективно и е насочена само кон минатото, само кон поранешни функционери и службеници додека воопшто не се опфатени актуелните функционери и службеници, иако биле на функции на денот кога се случила трагедијата. Од СДСМ велат дека ќе инсистирале на неселективна, независна и темелна истрага во која сите ќе одговараат согласно законите. Најавија дека преку анкетна комисија во собранието ќе ги утврдуваат фактите, но и политичката одговорност за трагедијата која што се случи во Кочани. Во однос на внатрепартиските избори за претседател на СДСМ, кои беа одложени поради трагедијата во Кочани, централниот одбор донесе одлука да се одржат на 6-ти Aприл а единствен кандидат останува Венко Филипче, стои во соопштението од партијата.
