Во источниот регион, проблемот со кучињата скитници ќе се решава на регионално ниво. Градоначалниците покренаа иницијатива, а Советот за развој на Источно-планскиот регион донесе одлука за изработка на проектна документација за изградба на стационар за згрижување на бездомните кучиња. За почеток се предвидени околу 100.000 евра, со најава дека ќе се обезбедат и дополнителни средства за целосна реализација на проектот. Во опција се повеќе локации, меѓу кои и во Општина Карбинци.
„Во моментот работиме за изнаоѓање на локации. Понудена е локација во Општина Карбинци, а понудена е локација и во други општини. Оставаме да одлучат проектантите, односно тие да кажат која локација е најпогодна. Тоа за нас не менува ништо, на нас како регион ни е важно да се изгради стационар каде хумано ќе бидат згрижени бездомните животни“, изјави Тони Тоневски, претседател на Совет на ИПР и градоначалник на Пробиштип.
Во меѓувреме, општините проблемот со бездомните кучиња го решаваат преку ангажирање на фирми кои вршат заловување и хуман третман на животните. Досегашното искуство покажува дека овој пристап не дава трајно решение, а истовремено носи сериозни финансиски оптоварувања за општинските буџети. Пробиштип годинава за првпат воведува и дополнителна мерка – стимулирање на сопственици да ги кастрираат своите миленици.
„Ние одлучивме оваа година да направиме уште еден чекор во решението на проблемот со бездомните животни, а тоа е да ги стимулираме сите сопственици на домашни миленици да ги кастрираат своите миленици, односно да им помогнеме да ги субвенционираме како општина заедно со локалните ветеринарни станици“, изјави Тони Тоневски, претседател на Совет на ИПР и градоначалник на Пробиштип“, изјави Тони Тонески, претседател на Совет на ИПР.
Регионални стационари за згрижување на бездомните кучиња, каде добиваат хуман третман, има во Струмица и Кавадарци.
