Ракетен оган од Либан го погоди Израел, предизвикувајќи голема штета во северниот град Кирјат Шмона. Иранските медиуми пишуваат дека станува збор за ракети на Хезболах, но одговорноста ја презеде Хамас, велејќи дека истрелал 12 ракети. Израелските одбранбени сили возвратиле со жестоки напади.
„Борбените авиони на Израел погодија серија цели на Хезболах во Либан, вклучително воени пунктови, терористички инфраструктури, штабови, и складишта за оружје. Тие излегуваат од тунелите, нѐ напаѓаат и се враќаат. Серијата напади вечерва беа одговор на ракетниот оган претходно од либанската граница на северот со Израел“, изјави Даниел Хагари, портпаролот на ИДФ. Тој меѓудругото, рече дека во синоќешните борби загинале уште четворица израелски војници, вкупно 23 од почетокот на копнената офанзива, со која, наводно, веќе целосно го опколија градот Газа.
Додека конфликтот влегува во својата четврта недела и досега однесе повеќе од 10.000 животи на двете страни, државниот секретар на САД, Ентони Блинкен по пристигна во Израел на средба со Нетанјаху. Блинкен во втората посета изрази загриженост за страдањата на Палестинците и бара конкретни чекори за намалување на цивилните жртви во Газа.
Палестинскиот народ „се наоѓа во голем ризик од геноцид“, велат специјалните известувачи на ОН. „Времето за акција е сега. Остануваме убедени дека палестинскиот народ е изложен на голем ризик од геноцид“, се вели во соопштението на групата експерти, составена од седум специјални известувачи на ОН. „Бараме хуманитарен прекин на огнот за да се осигуриме дека помошта ќе стигне до оние на кои им е најпотребна“.
Утрово илјадници палестински работници беа депортирани од Израел. Ова откако владата на Нетанјаху соопшти дека ги укинуваат работните дозволи на Палестинците и ги прекинуваат сите контакти со енклавата. Палестинската Црвена полумесечина објави дека 102 камиони со хуманитарна помош денеска влегле во Газа преку египетскиот премин Рафах, првпат, поголем број камиони наеднаш влегоа во енклавата по отворањето на преминот на 21-ви октомври.
