Првиот заменик на претседателот на Владата и министер за европски прашања, Беким Сали, денеска оствари средба со претставникот на Европската инвестициска банка (ЕИБ) за нашата земја, Бјорн Габриел.
Како што се наведува во соопштението од Кабинетот на министерот за европски прашања, на средбата се разговарало за продлабочување на соработката меѓу Владата и ЕИБ, како и за забрзување на реализацијата на проекти поддржани од Европската Унија.
– Посебен акцент беше ставен на проектите во областа на инфраструктурата, енергетиката, животната средина и поддршката за малите и средните претпријатија – се посочува во соопштението.
Заменик-претседателот на Владата, Сали, ја истакнал важноста на ЕИБ како клучен партнер во унапредувањето на економскиот развој и поддршката на реформската и интегративна агенда на земјата кон Европската Унија.
Претставникот на ЕИБ, Габриел, ја потврдил подготвеноста на Банката да продолжи со поддршката и да го прошири партнерството преку стратешки проекти, кои придонесуваат за одржлив развој на земјата.
