Шест полицајци завршија во болница со изгореници од пиротехнички средства, додека 14 луѓе се приведени по насилните судири што избунаа синоќа во Тирана меѓу полицијата и опозициските демонстранти, предводени од Сали Берија. Тие бараа оставка од албанската влада по обвинувањата за вмешаност на заменик-премиерката во корупција.
За време на тричасовниот протест, демонстрантите фрлаа молотови коктели врз кабинетот на премиерот Еди Рама, Министерството за внатрешни работи и седиштето на Социјалистичката партија. Покрај нападите врз институциите, демонстрантите запалија полициско возило и контејнери, а оштетени се и бројни трговски објекти во центарот на градот.
Политичките тензии ескалираат од декември, откако Специјалното обвинителство ја обвини заменичката на Рама, Белинда Баљуку, за наводно мешање во јавни тендери за големи инфраструктурни проекти и фаворизирање на одредени компании. Баљуку ги негира обвинувањата.
