Претседателот на Собранието, Африм Гаши, денеска имаше проштална средба со амбасадорката на Република Грција, Софија Филипиду. Тој во името на пратениците и во свое име ѝ се заблагодари на амбасадорката Филипиду за посветеноста и ангажманот за унапредување на односите меѓу нашата земја и Република Грција и за продлабочување на меѓусебното пријателство и соработка – соопштија попладнево од собраниската прес-служба.
Како што се наведува во соопштението од собраниската прес-служба, претседателот на Собранието истакнал дека земјата останува искрено посветена на градењето добрососедски односи, засновано врз меѓусебно почитување, констуктивен дијалог и соработка во области од заеднички интерес. Тој изразил уверување дека контитуираниот политички дијалог и отворената комуникација претставуваат најдобра основа за понатамошно продлабочување на билатералните односи.
Гаши истакнал дека европската интеграција останува наш врвен стратешки приоритет и земјата е цврсто определена да продолжи со реформите и исполнување на европската агенда.
– Амбасадорката Филипиду истакна дека Грција го поддржува процесот на проширување на Европската Унија и дека како претседавач со Советот на Европската Унија во втората половина на 2027 година ќе се залага да дава поддршка на европската перспектива на земјата како и на сите земји од Западниот Балкан – пишува во соопштението.
Гаши ѝ посакал на амбасадорката Филипиду многу здравје и успех во натамошните професионални предизвици.
