Ново интегрирано дигитално решение за следливост на свежо овошје и зеленчук од парцела до финален купувач е презентирано денеска од страна на ИНОФЕИТ – ЕДИХ и Швајцарската програма за зголемување на пазарната вработливост – ИМЕ.
Директорот на ИНОФЕИТ – ЕДИХ, професор д-р Димитар Ташковски објаснил дека дигиталното управување со земјоделското производство овозможува ефикасно следење и организација на клучните активности поврзани со бербата, испораката, складирањето, откупот, извештаите и анализата на податоците.
– Во ИНОФЕИТ – ЕДИХ сме посветени на поддршка на малите и средни компании во процесот на дигитална трансформација преку развој на практични и применливи решенија. Особено сме горди кога ваквите решенија имаат потенцијал да ги користат поголем број компании, бидејќи на тој начин се зголемува нивното влијание, се поттикнува соработката и се создава поширок позитивен ефект врз целиот екосистем, истакнал Ташковски.
AgroPath како дигитално решение е наменето за мали и средни земјоделски производители – производители на зеленчук, овошје, како и задруги и откупувачи.
– Решението овозможува следење на производите низ целиот производствен и извозен синџир, преку евиденција на податоци за производството, сертификација, контрола на квалитет и дигитална валидација на извозните пратки. На овој начин, купувачите добиваат брз пристап до проверени информации што придонесува за поголема доверба, поедноставени процеси за сертификација и подобрена позиција на извозниците, нагласил Ташковски.
Интегрираното решение е изработено за потребите на Здружението на производители и трговци на свежо овошје и зеленчук – МАКФРЕШ.
Според претседателот на Здружението Крсте Витанов, оваа алатка значително помага во надминување на реалните секојдневни потешкотии со кои производителите се соочуваат при управување со производството.
– AgroPath ни овозможува да го дигитализираме секој чекор од процесот – од берба до испорака. Благодарение на платформата имаме јасна евиденција, целосна следливост и сигурност дека нашите пратки се усогласени со барањата на купувачите. Ова ја зголемува довербата и ни отвора врати кон нови меѓународни пазари, потенцирал Витанов.
Веќе три компании-членки на МАКФРЕШ се во процес на имплементација на дигиталното решение, кое специфично се прилагодува на потребите на секој производител, а постои голем интерес за негова примена и кај останатите членови на МАКФРЕШ.
Швајцарската Програма за зголемување на пазарната вработливост – ИМЕ континуирано работи на поддршка на дигитализацијата и дигиталната трансформација на земјоделско-прехранбениот сектор, со цел јакнење на конкурентноста на компаниите и одржливи системски промени во секторот.
– Во таа насока, во директно партнерство со ИНОФЕИТ – ЕДИХ и МАКФРЕШ креиравме платформа која им овозможува на компаниите да обезбедат целосна контрола на движењето на производите. Ова решение ја зголемува транспарентноста, ја подобрува довербата помеѓу производителите и откупувачите и ја олеснува усогласеноста со меѓународните норми и стандарди, како клучни предуслови за развој на конкурентно снабдување на глобалните малопродажни синџири, истакнал Горан Дамовски, директор на Швајцарската програма за зголемување на пазарната вработливост – ИМЕ.
Решението ќе се надградува и проширува за различни култури, сорти и дополнителни потреби, со цел да креира долгорочна вредност и да ја зголеми конкурентноста на целиот сектор.
