Основниот суд во Струга денеска треба да продолжат судските процеси против градоначалникот Рамис Мерко за незаконско поставување директори во основни училишта во општина Струга. Во еден предмет се споени училишта во Лабуништа, Радолиšta, Подгорци, додека за училиште во Велешта и за „Браќа Миладиновци“ во Струга се водат два одвоени предмети. За случајот со училиште „Зини Хани“ во Велешта, покрај Мерко, уште четири лица се обвинети за злоупотреба на службата и фалсификување. Според обвинението, покрај незаконското поставување на Екзона Шеј за директор, таа се товари и за фалсификување дипломи. За предметот за ОУ „Браќа Миладиновци“, Мерко се товари за незаконско поставување на Албана Жута за в.д. директор и директор на училиштето иако не исполнивала услови, односно не била назначена од редот на вработените, немала положен испит за директор и соодветен сертификат за познавање англиски јазик. Сведоците во овие случаи, кои според судечкиот судија Јордан Јованов не се појавиле на претходните судења без оправдани причини, денеска треба да бидат спроведени со полициска асистенција. Против Мерко вчера се одржаа два судски процеси, за набавката на автомобил „Ауди А6“ за потребите на општината и за незаконско поставување спомен обележје – плоча на општинската зграда.
