Денес, потпретседателот на Владата на Република Македонија и министер за животна средина и просторно планирање, Изет Меџити, оствари работна средба со амбасадорката на САД, Н.Е. Анџела Агелер, во Владата на Република Македонија.
Средбата беше одржана во конструктивна и пријателска атмосфера, со фокус на унапредување на партнерските односи помеѓу двете земји. Посебно беше истакнато стратешкото партнерство и континуираната поддршка која САД ја дава на Македонија, особено во контекст на евроинтеграциите и реформите. Изет Меџити ја повтори посветеноста на Владата за продолжување на реформите и за соработката во рамките на НАТО.
Истакната беше и важноста на правосудните реформи, како и борбата против корупцијата како основа за стабилна демократија. Двајцата соговорници се согласија дека реализацијата на проектите за изградба на коридорите 8 и 10Д треба да продолжи со интензивирање, при што беше нагласена важноста на овие инфраструктурни приоритети. На крајот беше потврден интересот за продлабочување на пријателската и партнерската соработка помеѓу двете земји.
