На крајот на месец мај или најдоцна до средина на јуни, реактивната мисија на УНЕСКО ќе дојде во Охрид. Вицепремиерот Николоски истакна дека покрај другите локации на кои што ќе направат увид, согласно забелешките кои ги имаа, претставниците на УНЕСКО ќе одат и долж трасата на автопатот Охрид–Кичево.
УНЕСКО ја спори изградбата на трасата од автопатот Требеништа – Ќафасан, четвртата делница од проектот со конзорциумот „Бехтел и Енка“, за која се бара решение.
Инаку, вчера се пушти во употреба најголемата клучка на автопатот Охрид–Кичево кај Требеништа, инвестиција вредна десетици милиони евра, која ќе претставува стратешка сообраќајна точка и почеток на идниот автопат кон Ќафасан.
И покрај бројните предизвици, ова е уште една потврда дека ние сакаме да го градиме тој автопат доколку дозволи УНЕСКО, инаку не би ја граделе клучката, вели вицепремиерот и министер за транспорт и врски, Николоски.
Новата клучка нема да значи само побрз проток на сообраќајот, туку и сериозна инвестиција во идниот развој на регионот.
