Претседателот на Македонското друштво „Илинден“-Тирана, Никола Ѓурѓај, остварил средба со министерот за односи меѓу заедниците, Агон Ферати, во рамки на „Дијалогот Шлезвиг-Холштајн за зајакнување на социјалната кохезија и заштита на правата на малцинствата во Западен Балкан“. Средбата се одржала во Академскиот центар „Санкелмарк“, во Оверзе, германската покраина Шлезвиг-Холштајн.
На средбата биле разменети мислења за можностите за унапредување и продлабочување на меѓусебната соработка, со посебен акцент на зачувувањето на националниот идентитет, почитувањето на различностите и зајакнувањето на меѓусебното разбирање.
На министерот Ферати му бил подарен примерок од македонскиот весник „Илинден“.
Во разговорот било истакнато значењето на отворениот дијалог, меѓусебното почитување и континуираната соработка како важни предуслови за градење општество засновано врз принципите на еднаквост, толеранција и почитување на правата на сите заедници.
Од Македонското друштво „Илинден“-Тирана посочуваат дека средбата претставува можност за продлабочување на комуникацијата и соработката во насока на унапредување на малцинските права и зачувување на националниот и културниот идентитет.
