Домашните експерти и претставниците на меѓународната заедница во Македонија не го критикувале Советот на јавни обвинители, ниту членовите биле споменати во некаква негативна конотација, во ниту еден извештај за состојбата на правосудството. Претседателката на Советот на јавни обвинители, Душица Димитриевска како да не е информирана и да не гледа вести. И покрај сите критики упатени на нивна адреса во последниве години, таа е уверена дека членовите немаат врска со стопената доверба на граѓаните од 2%, во судско-обвинителскиот систем.
Иако последниот годишен извештај за работата на советот, беше негативно оценет од пратениците во Собранието коишто побараа членовите да си поднесат оставки од морални причини, претседателка Димитриевска вели дека тоа е работа на Парламентот, и таа немала информација како тие се оценети, ниту дека Извештајот поминал на пленарна седница.
Ниту државниот обвинител Љупчо Коцевски нема коментар за негативниот извештај на членовите на Советот. Тој вели дека прашањето за оставки од морални причини требало да биде поставено до членовите на Советот на обвинители, иако и тој е еден од членовите.
Инаку последниот скандал поврзан со Советот на Обвинители е упадот на претседателката Димитриевска и нејзиниот заменик Башким Бесими во Управниот одбор на Академијата за судии и јавни обвинители. Антикорупциската комисија ги повика Судскиот совет и Советот на обвинители да ги отповикаат членовите што ги именуваа во Управниот одбор на Академијата затоа што смета дека именувањето е незаконско. Членовите од Судски и од Обвинителски совет сакаат да селектираат кандидати во Академијата, но и да изменуваат и разрешуваат судии и обвинители. Според нив ова е морално и законско и тие не ги повлекоа членовите.
Претходно, членот на Советот Изет Меџети поднесе оставка, откако беше осомничен во случај со подмитување. Заедно со врховниот судија Наќе Георгиев договарале предмети за мито од 10 илјади евра. Мемети беше избран за член на Советот на јавни обвинители во Собранието.
ЕК е против распуштање на Судскиот и Обвинителскиот совет. Според нив распуштањето ќе ја поткопа независноста на судството, а Судскиот совет треба да се реформира со новиот закон. Сепак ЕК укажува и на тоа дека нема никаков напредок во борбата против корупцијата и нејзината распространетост во суте области.
